चैतको चढ्दो गर्मीले तात्तिँदै गएको विराटनगर सोमबार राजनीतिक उछलकुदले पनि उत्तिकै तात्तिएको थियो।
देवकोटा चोकस्थित प्रदेशसभा परिसरमा नेकपा एमाले र नेकपा माओवादी केन्द्रले सरकारलाई दिएको समर्थन फिर्ता लिने घोषणा गर्दै थिए। ठीक त्यहीबेला रोडशेष चोकमा रहेको मुख्यमन्त्री तथा मन्त्रिपरिषद् कार्यालयमा मुख्यमन्त्री केदार कार्की मन्त्रिपरिषद बैठक गर्दै थिए।
प्रदेश सभामा भेला भएका एमाले र माओवादीले बहुमत सांसदको हस्ताक्षरसहित सरकारलाई दिएको समर्थन फिर्ता गरेको पत्र मात्रै तयार पारेनन्, विशेष अधिवेशन बोलाउन समावेदन गर्ने तयारी पनि गर्दैथिए। उनीहरूले यस्तो तयारी गर्दैगर्दा मन्त्रिपरिषदले भने आगामी जेठ ११ का लागि प्रदेश सभाको बर्खे अधिवेशन बोलाउने सिफारिस पत्र तयार पार्दै थियो।
