गैँडाकोट नगरपालिका वडा नम्बर ८ स्थित भित्रि सडकखण्डमा आज भएको सवारी दुर्घटनामा आमाछोरी घाइते भएका छन् । नारायणगढबाट यात्रु लिएर भित्रि सडकखण्ड हुँदै कावासोतीतर्फ जाँदै गरेको सिटी बसले करिब १ बजे गैँडाकोट ८ वडा कार्यालयनजिक विकू चोकमा स्कुटरलाई ठक्कर दिएको हो । ना ७ ख १५७१ नम्बरको यात्रुबाहक सिटी बसले लु ९४ प ३७११ नम्बरको स्कुटरलाई ठक्कर दिदाँ स्कुटरमा सवार आमा छोरी घाइते भएका हुन् । घाइते हुनेमा स्कुटरको पछाडी सवार गैंडाकोट नगरपालिका वडा नम्बर ५ बस्ने ४२ वर्षिया रिता कँडेल र उहाँकी छोरी १९ वर्षिया संजिता कँडेल रहेका छन् । आमाको टाउको पछाडीको भागमा चोट लागेको अवस्था बोल्न सक्ने मध्यम रहेको र छोरीको बाहिरी चोट नरहेको एवं शरीरको भित्री भागमा सामान्य चोट लागेको प्रहरीले जनाएको छ । उनीहरुको नयाँ मेडिकल कलेज भरतपुरमा उपचार भइरहेको छ ।
विकू सहकारीबाट निक्लने वित्तिकै चोकमा उनीहरुलाई बसले ठक्कर दिएको हो । ठक्कर दिने बस, बसका चालक अनुज नेपाली र स्कुटर प्रहरी नियन्त्रणमा रहेका छन् । घटनाका विषयमा अनुसन्धान भइरहेको इलाका प्रहरी कार्यालय गैँडाकोटका प्रहरी निरीक्षक हस्तबहादुर सुनारले जानकारी दिनुभयो ।
